Siglir tar il cuntegn

Chantun Bunas experientschas cun derschaders laics

Ils tschintg da zercladur vegnan elegids derschaders per quatter dretgiras districtualas en il Grischun. Tar las autras set dretgiras hai tuttina blers candidats sco sezs. Per candidar sco derschader u derschadra per la dretgira districtuala na dovri nagin studi da dretg.

chombra civila dalla dertgira districtuala Alvra
Legenda: La chombra civila Alvra cun ils derschaders laics Rino Bergamin e Toni Sonder, il president Hermann Laim, Paul Dosch e Margaritha Poltera-Lippuner (da dretg a sanester). RTR, G. Gabriel

En il Grischun han derschaders laics ina lunga tradiziun. Er en la dretgira districtuala d'Alvra èn ils derschaders laics. Sulettamain ils presidents dallas dretgiras ston avair studegià giurisprudenza.

Per candidar sco derschader u derschadra drovi almain tschintg suttascripziuns da votants ch'abitan en il district. Elegids vegnan ils derschaders lura dal pievel.

entrada dertgira districtuala Alvra
Legenda: Tar la dertgira districtuala Alvra è sulettamain il president giurist. RTR, G. Gabriel

Uschia han era las partidas interess vida sezs en las dretgiras, conferma Hermann Laim, president dalla dretgira districtuala Alvra. «Dad otg derschaders èn sis vegnids nominads da partidas.»

Dentant na saja quai betg uschia che las partidas sa maschaidian en memia fitg en la practica dallas dretgiras, manegia el.

Turitg vul abolir derschaders laics

Hermann Laim stimescha la collavuraziun cun ils derschaders laics. «Els portan cun las cumpetenzas ord lur professiuns. Nus avain gì blers cas nua che gist questas cumpertenzas èn stadas impurtantas.» A Turitg vesi ora auter: Là vegni votà davart abolir ils derschaders laics. Questa practica na saja betg confurma al temp ed ils cas vegnian adina pli complex, argumenteschan ils iniziants. Laim n'è betg da quest avis: «Jau crai ch'ins haja fatg e vegn a far bunas experientschas cun las dretgiras che n'èn betg dal tuttafatg professiunalas en il Grischun.»

RR actualitad 11:00