Dapi ils 11 da matg han blers alloschaments turistics puspè avert lur portas, sco per exempel las chamonas. Ils campadis sco impurtanta pitga dal turissem ston dentant spetgar vinavant. Quest futur intschert vilenta ils possessurs da campadis en il Grischun, perquai che l'interess da la glieud fiss franc qua.
Emblidà da la Confederaziun
Peter Käch, Il possessur dal campadi «Islas» a Filisur manegia, ch’ins haja emblidà ils campadis tar la planisaziun per sortir il lockdown. Cunquai che la lobi dals campadis saja pli pitschna che quella da l’hotellaria u gastronomia hajan sco emprim quellas spartas da la branscha gì prioritad. I na saja betg logic ch’in campadi na dastga betg avrir, dentant ina chamona schon nua ch’il spazi è anc pli limità. I fiss senz’auter pussaivel dad implantar in concept da segirezza che correspunda a las prescripziuns d’igiena.
Era Wolfgang Bosshardt dal campadi «Sur En» a Sent manegia ch’i saja vegnì exagerà da la Confederaziun. La politica stoppia ussa vegnir cun respostas per che la stagiun da stad possia cumenzar bain.
Reservaziuns dessi avunda
Ivan Zangerle dal campadi «Muglin» en la Val Müstair di ch’i dettia adina puspè persunas che vegnian cun la rulotta e dumondian sch’els possian spontan cudeschar in plaz. A quels stoppia el dentant dir giu, schegea ch’el beneventass gugent la glieud. Vinavant vegnian mintgadi plirs telefons da persunas che dumondian sch’il campadi saja avert. Fin ussa haja el survegnì dapli reservaziuns cumpareglià cun la medema perioda da l’onn passà. Quai saja in ferm indizi che l'appel da la Confederaziun da far vacanzas en Svizra haja gì effect. Dentant be avair bleras reservaziuns na bastia betg – ellas stoppian era esser realisablas.
