Livio Capaul che lavura dapi quatter onns tar il bain puril da la famiglia Arpagaus a Falera ha dastgà prender encunter sia Lina al Plantahof a Landquart. La Lina è stada ensemen cun 10 autras vatgas grischunas a Verona al campiunadi europeic da vatgas brinas.
Là ha Lina gudagnà en la categoria da las senioras cun il pli bel iver da vatgas brinas. Quai fa grond plaschair a Livio Capaul che pavla la Lina mintga di. Dentant anc dapli plaschair ha el, da puspè prender a chasa sia Lina:
Jeu spetgel schon daditg vess sin ch'ella turna. Senza ella manca insatge a mai en stalla. Quai n'è betg il medem sch'ella n'è betg. Jau sun cuntent ch'ella è uss puspè a chasa.
In bel mument suenter in fitg grev temp
Livio n'è betg stà a Verona al campiunadi europeic cun Lina damai ch'el ha tgirà a chasa il rest da las vatgas. Persuenter ha Andrea Arpagaus che maina il bain puril a Falera accumpagnà la vatga Lina a la victoria. Per ella e quai stà dapli che ina concurrenza:
Quai èra ina finamira che mes um aveva anc. El n'ha dentant betg pudì festivar cun nus la victoria, damai ch'el e mort l'atun passà. Perquai hai jau vulì ademplir ad el quest ultim giavisch.
Ulteriura victoria per il Grischun
Dasper la vatga Lina ha era la vatga Gentel da Georg Florin da Serneus gudagnà. Lina ha il pli bel iver da las vatgas brinas senioras e Gentel il pli bel iver tar las vatgas junioras.
RTR Telesguard 17:40