«Uschespert che la PPS u in’autra partida candidescha per il Cussegl dals chantuns, vegn era la PS dal Grischun ad examinar la situaziun e reponderar fitg bain ina candidatura», ha Lukas Horrer, il manader dal cumbat electoral da la PS confermà ad RTR. «Pertge en quest mument daventa ina candidatura era per la PS attractiva.»
Cun tgi che la PS giess lura en il cumbat electoral, sch'i vegniss propi uschia ch’era autras partidas sper la PLD cun Martin Schmid e la PCD cun Stefan Engler candidassan per il Cussegl dals chantuns, leva Lukas Horrer betg tradir. Mo tant: «Igl è nossa pli ferma candidata ni noss pli ferm candidat» – pia u la cussegliera naziunala Silva Semadeni ni il president dals socialdemocrats dal Grischun, Jon Pult. Omadus candideschan il mument per il Cussegl naziunal.
Adina puspè empruvà
Adina puspè han ils socialdemocrats empruvà dad attatgar ils burgais e da vegnir en la chombra pitschna. Il 1998 ha Silva Semadeni empruvà, schanzas n’ha ella betg gì. Il 2002 ha Peter Peyer empruvà. Era el, n’ha gì nagina schanza. Il 2007 ha Johannes Pfenninger empruvà e puspè hai dà ina schlaffada. Avant 4 onns n’han ils socialdemocrats dentant lura betg gughegià dad anc ina giada attatgar il duo burgais.