Siglir tar il cuntegn

Header

Trais uffants vid far termgals.
Legenda: Il resun general en las canortas dil Grischun è – ellas han in toc pli pauc uffants che normalmain. Keystone
cuntegn

Canortas en il Grischun Dapli tgiraders ch'uffants en las canortas

Las canortas en il Grischun han in toc pli paucs uffants che normalmain. A Valbella sajan en il mument mo la mesadad dals 23 uffants en la canorta. Sumegliant è la situaziun a Cuira, Domat e Zuoz. En l’Engiadina'Ota sajan perfin be in quart dals 100 plazs en las canortas occupads.

Bleras canortas, sco quellas a Cuira ed en l’Engiadina mettan gronda paisa da laschar plaz per uffants da famiglias ch’èn propi visads sin quella purschida.

Las canortas èn avertas, ma sulet per uffants nua ch’ils geniturs n'han nagin'autra pussaivladad da laschar tgirar els.
Autur: Laurence BadilattiVicepresidenta dal cussegl da fundaziun da las quatter canortas da l’Engiadin'Ota

Gabriela Greiser, manadra da la canorta a Scuol, di che lur purschida saja per cas urgents e che blers geniturs hajan chattà ina schliaziun privata.

En quella situaziun speciala prendian els era si uffants ch’èn atgnamain memia vegls per ir en ina canorta. In exempel è ina buoba da set onns. Ella visita uss la canorta a Scuol ensemen cun ses fragliuns, per ch’ils geniturs sappian ir a lavurar.

Novas sfidas e mesiras

Sco la presidenta da l’Uniun da tgira d’uffants Laibella, Kim Osinga, declera hajan ils collavuraturs uss era da prender novas mesiras. Per exempel sajan ils tgiraders e las tgiradras sensibilisads da betg prender si uffants che han tuss u ch'èn malsauns. Normalmain na saja quai nagin problem.

In’autra sfida è la igiena ed il tegnair distanza. Laurence Badilatti accentuescha ch’i saja grev da declerar ad in uffant da trais onns ch’i fiss meglier da betg tegnair il maun da la tgiradra u da dar adatg durant far termagls.

Las finanzas = IL problem

Per bleras canortas dettian las finanzas da pensar.

Nus vegnin simplamain als cunfins cun ils meds finanzials che nus avain – e la è in grond segn da dumonda.
Autur: Laurence BadilattiVicepresidenta dil cussegl da fundaziun da las quatter canortas da l’Engiadin'Ota

Il chantun e la Confederaziun pretendian che las canortas stoppian esser avertas. Il persunal è la, mo ils uffants betg.

RTR actualitad 08:00