La palusa bletscha u il mal marsch (Moderhinke) è in'infecziun da bacterias fitg dolurusa. Tar ils animals pertutgads s'inflammeschan las unglas e cumenzan a smarschir.
La malsogna pertutga cunzunt nursas dentant er auters animals cun unglas sfessas pon s'infectar cun quellas bacterias. Ella è fitg contagiusa: per in'infecziun na vuli gnanc in contact direct, i tanscha sch'ils animals pasculeschan en il medem lieu.
Perquai èn uss er capricorns s'infectads, l'Uffizi da chatscha e pestga conferma radund diesch cas. Pertutgads èn mo bucs pli vegls, perquai suppona l'uffizi ch'il pais haja in'influenza sin la malsogna. Capricorns feminins u pitschens n'èn betg pertutgads.
L'Uffizi observescha il svilup da la malsogna tar ils capricorns
Ils davos onns eran adina radund tschintg fin diesch capricorns pertutgads en il Grischun. Quai onn èn gia enconuschents diesch cas concrets.
Georg Brosi, il manader da l'uffizi da chatscha, na quinta dentant betg cun ina epidemia. I sa tractia er quai onn da cas singuls en differentas regiuns.
RR novitads 06:00