Siglir tar il cuntegn

Chantun Car-sharing en il Grischun: Bain nagin boom, però creschi

Ils autos cotschens da mobility stattan gia dapi in temp sin diversas staziuns en il chantun Grischun. Mo quant fitg è il Carsharing insumma derasà? Ed ha el in futur en regiuns periferas?

auto da mobility a Lucerna
Legenda: Mobility è pli derasà en ils centers urbans, perquai ch' dovra ina buna rait da traffic public. Keystone

Il dumber da clients creschia cuntinuadamain era en las regiuns periferas, dentant bler pli plaun ch'en ils centers urbans, declera Alain Barmettler, pledader da medias da Mobility. 1'200 clients da Mobility datti momentan en il Grischun; la mesadad da quests èn a Cuira.

Daventa strusch in «boom»

«Dad onn tar onn pudain nus registrar in augment da clients. Il dumber da clients dal Grischun crescha perfin pli spert che per exempel en il Vallais u en il Tessin.» Mobility saja oravant tut ferm en las regiuns cun ina buna rait da traffic public. Il client tipic è tenor Barmettler numnadamain sin via cun il traffic public. «Cura ch'el dovra in auto, ha el ina schliaziun cun mobility.» In boom na daventia il prender a fit autos aschia betg en regiuns periferas.

Potenzial è avant maun

Dasper Mobility datti anc in auter purschider da Car-sharing: la plattafurma d'internet Sharoo. Sur questa pon privats dar a fit lur autos. Tut capita online. Clavs na dovri naginas, perquai ch' ins po avrir l'auto cun agid dal telefonin. I haja era schon vehichels dal Grischun u dad autras regiuns periferas sin la plattafurma, ha declerà il manader da finanzas, Bernhard Städler. Potenzial per il Car-sharing hajan era las regiuns periferas, constatescha el. I dovria be ina persuna che na dovria betg trasoras l'agen auto. Sche questa persuna partia ses auto cun auters, lura vegnia el dovrà pli savens ed ins possia era anc gudagnar insatgé. «Cun quai che Sharoo na posseda betg sez autos, na stuain nus era betg finanziar tals per 100%.» Sch'ina persuna privata possia dentant dar a fit ses auto duas giadas al mais, lura saja quai tuttina lucrativ - era en regiuns periferas. Era sch'ins na po il mument anc betg discurrer d' in trend da Car-sharing en il Grischun, la purschida ed il diever creschian plaunet.

RR actualitad mezdi