Siglir tar il cuntegn

Header

cuntegn

Chantun Cartas da credit - pratic ma betg adina segir

Cartas da credit èn praticas. Saja per cumprar bigliets, cumprar online u era en butia. Dentant èsi da cussegliar in pèr mesiras per proteger las datas da la carta.

Sco emprim ston ins differenziar dus tips da cartas da credit. Ina giada datti las cartas da credit sco fin qua. Lura datti er quellas cun la funcziun da pajar senza contact e senza stuair endatar il pin. Uschia pon ins pajar summas da fin 40 francs.

Tar quellas èsi pussaivel ch' ins legia giu tschertas datas cun tegnair datiers in telefonin u in auter apparat. Quai è almain sa mussà cun far emprovas.
Autur: André Bähler Fundaziun per la protecziun da consuments

Etui u folia d'aluminium

Il pli segir saja da pretender ina carta senza l'uschenumnà chip da func che pussibilitescha da pajar senza contact. Cartas cun chip portan in simbol cun quatter undas - in pau sco in simbol da WLAN. Tgi che na vul betg desister sin la funcziun da pajar senza contact, possia cumprar in etui spezial ch'impedescha, ch'i vegn transmess datas e cun quai er che las datas pon vegnir registradas dad auters. «Ina varianta è d'enzugliar ella en folia d'aluminium. Quai n'è dentant betg practic.»

Resguardar reglas da segirtad

Il problem che datas vegnian enguladas è per Christine Anderes, pledadra da medias da la Viseca plitost pitschen. La Viseca è ina da las interpresas che distribueschan las cartas da credit. Il scenari, ch'insatge vegniss da leger datas da la carta cun tegnair datiers in apparat spezial è tenor ella plitost teoria che realitad. «Uschia u uschia - sch'in possessur resguarda las reglas da segirtad, na datti er nagin donn finanzial sch'igl avess da capitar ina giada insatge.» Tgè reglas che quai èn, stat en il contract u savens en las cundiziuns generalas da fatschenta. Tenor omasduas experts èsi impurtant ch'ins controlleschia mintga mais l'extract. Sbagls ston vegnir annunziads aifer 30 dis, uschiglio vala la transacziun sco accceptada.

RR actualitad 11:00

Artitgels legids il pli savens