Entant èsi cler ch'almain ina da las firmas pertutgadas (KIBAG) tira vinavant la decisiun al Tribunal administrativ federal.
Tranter ils onns 2004 e 2010 sajan las 12 firmas sa cunvegnidas a pretschs per differents projects. Ellas hajan repartì tranter ellas ils projects da vias chantunals e communals ed hajan fatg cunvegnas davart las offertas. Tar radund 650 projects haja dà cunvegnas cun ina valur d'almain 190 milliuns francs. Pertutgads da questas cunvegnas sajan chantun e vischnancas.
La dimensiun haja fatg surstar, di Frank Stüssi vicedirectur da la Cumissiun da concurrenza. Suenter in sumegliant cas en il Tessin n'avess ins betg spetgà quai en il Grischun:
Tgi sto pajar quant?
Firma da construcziun | chasti (en milliuns francs) | Reacziun |
---|---|---|
KIBAG Bauleistungen SA | 1,7 fin 2,0 | fa recurs |
Mettler Prader SA | 1,2 fin 1,5 | ? |
Walo Bertschinger SA Chur | 1,0 fin 1,3 | ? |
Palatini SA Vaz Sut | 0,9 fin 1,2 | ? |
Casty Bau SA | 0,9 fin 1,1 | ? |
Hew SA Bauunternehmung Cuira | 0,8 fin 1,0 | ? |
Schlub-Gruppe | 0,7 fin 0,9 | ? |
Foser SA | 0,5 fin 0,9 | ? |
Centorame SA | 0,4 fin 0,6 | ? |
Käppeli's Söhne SA | 0,4 fin 0,6 | ? |
Toldo-Gruppe | 0,3 fin 0,4 | acceptà decisiun WEKO |
Implenia Schweiz SA | nagin chasti pervi da regulaziun da perditgas principalas | - |
Otg da las 12 firmas avevan gia ordavant fatg ina cunvegna da cumparaziun cun il chantun e pajà 6 milliuns al chantun ed a las vischnancas pertutgadas. Quai ha per consequenza ch'ils chastis per questas firmas èn sa reducids. En tut 14 milliuns pli pauc, scriva la WEKO.
Nov firmas eran sa cunvegnidas avant la decisiun da la WEKO cun ils donnegiads dal cartel. Ellas èn s'obligadas da pajar radund 6 milliuns francs al chantun ed a vischnancas pertutgadas. Las sancziuns per questas firmas ha la WEKO perquai reducì per total radund 3 milliuns francs. Nagina cunvegna cun il chantun han fatg la KIBAG, la Implenia e Casty.
KIBAG tira enavant il cas
Da vart da la WEKO è il cas dal cartel da construcziun cun quai serrà giu. Da lur vart na datti naginas sentenzias pli. Omaduas decisiuns pon dentant anc vegnir tratgas avant il Tribunal administrativ federal. Entant èsi cler che almain ina da las firmas pertutgadas tira vinavant la decisiun al Tribunal federal: La KIBAG che stuess pajar il pli aut chasti ha gia decis da far quai, sco ella scriva en ina communicaziun.
La KIBAG argumentescha ch'i saja dubius da la WEKO da tschertgar schliaziuns cun empruvar da smanatschar che la firma da construcziun vegnia exclusa da la concurrenza u d'empermetter ch'i dettia reducziuns da chastis cun pajar ina summa pauschala. Per quests motivs na saja la fatschenta betg stada pronta da collavurar cun las autoritads ed il chantun.
Reacziun da l'Uniun d'impressaris
Maurizio Pirola, il president da l'Uniun d'impressaris è surstà da la dimensiun dals chastis. En quella autezza possian quels propi esser in privel existenzial per in'interpresa. Ch'ils chastis da la WEKO hajan però donnegià il image dals impressaris na crai Maurizio Pirola betg, sco el ha ditg envers RTR.
Engiadin'Ota
En la segunda decisiun davart il cartel en Engiadina ha la WEKO constatà che duas, respectiv en in cas trais firmas, hajan cuntrafatg a la lescha. Da 10 cunvegnas betg lubidas sajan pertutgads bajetgs da construcziun auta e bassa da privats sco era sin basa communala. Sis projects sajan da privats e quatter da vischnancas.
Chastiads vegnan:
- Rocca+Hotz SA (480'000 francs)
- Foffa Conrad SA (11'000 francs)
- P. Lenatti SA (2'000 francs)
RR novitads 08:00+