Siglir tar il cuntegn

Header

cuntegn

Cartel da construcziun PUK pretenda dapli daners

La cumissiun parlamentara d'inquisiziun (PUK) che prenda sut la marella las cunvegnas da pretschs illegalas en il sectur da construcziun en Grischun, dovra dapli daners. Ella ha inoltrà al Cussegl grond la dumonda per 350'000 francs supplementars.

Custs totals da 950'000 francs

Il zercladur da l'onn passà aveva la PUK survegnì mess a disposiziun 600'000 francs per las inquisiziuns. Fin l'avust da quest onn han ils custs da la PUK muntà a 482'792 francs, scriva la PUK en sia dumonda al parlament. Sin basa da calculaziuns approximativas saja da far quint cun custs da tut en tut 950'000 francs – fin che tut las examinaziuns sajan serradas giu. La dumonda per ils daners supplementars vegn tractada en la sessiun d'october dal Cussegl grond.

Tenor atgnas indicaziuns èn ils tschintg commembers da la PUK s'inscuntrads fin uss a 46 sesidas ed han manà tras durant 80 uras interrogaziuns. Surtut saja la cumissiun sa fatschentada cun las circumstanzas enturn l'arrestaziun dad Adam Quadroni che aveva fatg enconuschent las cunvegnas da pretschs illegalas.

Emprim rapport intermediar vegn il december

Tar il tema enturn l'arrestaziun numnada sura, sajan las interrogaziuns entant serradas giu, scriva la PUK. Il rapport intermediar latiers vegnia preschentà il december al Cussegl grond.

Parallel sa fatschenta la PUK cun il segund punct da l'incumbensa. En il center stat là la dumonda, sche commembers da la regenza u collavuraturs da l'administraziun han surpiglià lur responsabladad tar las proceduras da submissiun en il sectur da construcziun. Pli detaglià vegn guardà sin il controlling e la surveglianza interna.

Ord l'archiv:

Il zercladur dal 2018 ha il Cussegl grond per l'emprima giada decidì da metter en ina cumissiun d'inquisiziun parlamentara:

Video
Il cartell da l'Engiadina vegn examinà d'ina PUK
Or da Telesguard dals 13.06.2018.
abspielen

RR novitads 11:00