Interpresas ch'han gia fatg quai e ch'han survegnì ina resposta negativa, na ston betg inoltrar ina nova dumonda. Quellas vegnan suttamessas ad ina nova examinaziun ed in nov giudicament. Quai è ina da las midadas ch'il chantun ha fatg per adattar l'execuziun a las decisiuns che la Confederaziun ha relaschà il prim d'avrigl.
Ils agids per cas da direzza cuntinueschan era suenter las averturas dals 19 d'avrigl. Quai vala cunzunt per manaschis da la gastronomia.
Interpresas cun passa 5 milliuns svieuta
Per interpresas che han ina svieuta annuala da passa 5 milliuns, datti reglas da la Confederaziun unitaras sur l'entira Svizra. Per quellas interpresas vala ina limita da contribuziun da maximal 5 milliuns francs e 20% da la svieuta da l'onn avant. Tar interpresas che han dapli che 70% sperdita, vala ina limita da 10 milliuns e 30%.