Dentant ha sia advocata inoltrà in recurs tar la Dretgira chantunala dal Grischun encunter l'autoritad per la protecziun d'uffants e creschids, la KESB. La dunna pretenda numnadamain che la KESB haja tralaschà, d’intercurir il cas en urden e che las autoritads n'hajan betg dà a la dunna l’occasiun, da sa dustar.
I sa tracta d’ina intervenziun massiva da la KESB, sch’ella decida ch’uffants ston vegnir plazzads en auters lieus. Tenor la lescha sto la KESB dentant cumandar talas mesiras, sche uffants èn en privel – pertge els na san betg sa dustar sezs. Sche quai è propi stà necessari u betg, na san ins betg giuditgar.
KESB e polizia sa defendan
La KESB sa betg prender posiziun en detagl, per betg periclitar ils dretgs persunals da tut ils pertutgads. Ella di dentant che talas decisiuns vegnian adina prendidas da trais persunas spezialisadas ensemen, che pondereschian fitg bain tge ch’ellas fan. Ed il bainstar dals uffants haja adina prioritad.
La polizia ch'è stada en l'abitaziun da la mamma, di che l'acziun saja stada commensurada e capitada da moda correcta e cun calma.
