Avant tschintg onns eri vegnì a la glisch che la firma per puntanadas a Domat haja cugliunà sistematicamain ses lavurers. Ella n’haja betg pajà ora las sururas.
Ils lavurers han uss lur pajas
Cun agid dal sindicat Unia han ils indesch lavurers pertutgads cuntanschì ina cunvegna ed avant dus mais èn els vegnids pajads per las sururas prestadas.
La part penala da quest cas n’è dentant anc betg lugada: La fin d’avrigl ha la procura publica inoltrà l’accusaziun tar la Dretgira dal Plaun. A l’anteriur patrun e sia secretaria vegnan renfatschads delicts da facultad, sfalsificaziun da documents e delicts encunter il dretg da lavur.
D’inoltrar accusaziun saja ì uschè ditg perquai ch’i sa tractia d’in cas cumplex cun blers mussaments per differents delicts, ha la procura publica scrit sin dumonda da «Schweiz Aktuell».
L’anteriur patrun da la firma Tscharner n’ha betg vulì prender posiziun. Per el e la secretaria vala fin tar ina decisiun da dretgira la presumziun d’innocenza.