La stad passada aveva il Cussegl grond dà in credit da 7,7 milliuns francs per bajegiar il nov center d'asil sin il Meiersboden. In quartier da Cuira che sa chatta dentant sin il terren da la vischnanca da Curvalda. Suenter ch'igl è vegnì fatg sondaziuns la surpraisa: Ils lavurers han constatà ch'il terren è contaminà. Quai n'era dentant betg inditgà sin il cataster.
Cumissiun quinta cun custs dad 890'000 francs
Perquai ha la cumissiun da gestiun dumandà per in credit supplementar dad CHF 890'000. Tar ils deputads dal Cussegl grond n'è la chapientscha per questa surpraisa betg stada avant maun. Jan Koch, deputà da la PPS per exempel, na pudeva betg chapir che nagin saveva da questa deponia ch'è vegnida schliada ils onns 60. I na possia betg esser che uschia insatge na vegnia betg sclerì endretg. Perquai era el lura er encunter il credit.
Deputads approvan credit
La gronda part dals deputads eran dentant d'in auter avis, cun 86 tar 24 vuschs ed ina abstenziun han ils deputads approvà il credit supplementar dad 890'000 francs.
RR actualitad 12:00