Siglir tar il cuntegn
Inhalt

Chantun Center da transit «Löwenberg» a Schluein vegn serrà

Perquai ch'i dat adina pli paucs requirents d'asil, serra il chantun divers centers d'alloschi. Tranter auter vegnan ils centers da transit a Schluein e Spleia serrads l'auter onn. Quai ha communitgà la regenza grischuna.

Legende: Video Center da transit «Löwenberg» serra abspielen. Laufzeit 03:01 Minuten.
Or da Telesguard dals 24.09.2018.

Tenor Marcel Suter, manader da l'uffizi da migraziun e da dretg civil saja il chantun fitg engraziaivel per l'agid da la vischnanca da Schluein sco er da l'uvestgieu. Uss haja il chantun però prendì la chaschun da visar il contract da locuziun. Uschia haja uss anc dus centers en la Surselva: in a Mustér l'auter a Laax. Sch'ins dovria il futur puspè dapli centers, sche lura veglian ins er resguardar la repartiziun sin las regiuns, uschia Suter.

Il chantun ha segir profità da la situaziun dals requirents d’asil. El ha survegnì daners da la confederaziun, e quels daners n'ha el betg dà vinavant in tar in a la vischnancas.
Autur: Bruno Wellingerpresident da vischnanca da Schluein

Marcel Suter na chapescha betg l'argument davart il burdi finanzial. Sco el ha ditg envers RTR, na dettia nagina pretensiun da la vischnanca da Schluein vers il chantun pervia d'expensas. Ed el na sappia er betg da tge expensas ch'i sa tracti exact.

65 persunas midan center

Il chantun ha uss peda in onn da reparter las 65 persunas che vivan en il «Löwenberg» en auters centers existents e da chattar plazzas per ils collavuraturs. Anc n'esi però betg cler, nua ch'ils uffants che vivan en il center a Laax van a scola, suenter ch'il «Löwenberg» è serrà. Fin uss gievan er lezs a scola en il center a Schluein.

Lung temp senza problems gronds a Schluein

A Schluein va a fin ina lunga istorgia quai che appartegn requirents d'asil. Il center da transit dumbrava per part fin 100 persunas, quai sin ina vischnanca da 500 abitants. Els hajan gì il cletg da pudair ospitar famiglias da requirents d'asil ed uschia haja strusch dà problems, ha ditg Bruno Wellinger. Il sulet punct negativ sajan las finanzas stadas.

Las vischnancas che han da quels centers portan in grond burdi per tut las autras vischnancas che n'han nagins centers.
Autur: Bruno Wellingerpresident da vischnaca da Schluein

Sper Schluein, er a Spleia

L’immobiglia a Schluein è vegnida duvrada dapi l'onn 1989 sco center da transit. Il contract da locuziun per il center «Löwenberg» ha il chantun desditg sin la fin settember 2019. Il center da transit Pratigiana a Spleia vegn serrà en l'emprim quartal dal 2019. L'immobiglia a Spleia vegn però salvada sco reserva che po vegnir reactivada aifer curt temp. Pertutgads da las duas serradas da manaschi èn set collavuraturas e collavuraturs d'assistenza sco er tschintg persunas d'instrucziun. Ad ellas vegn tenor pussaivladad purschì ina nova plazza en in auter lieu. Gia sin la fin d'october da quest onn vegn il center a Valchava en la Val Müstair serrà.

Damain requirents partids tiers da la Confederaziun

grafica.
Legenda: Dumber da novas entradas da requirents d'asil dapi il 1998. RTR, Grafica

La raschun ch'il chantun reducescha las capacitads d'alloschi è, che la Confederaziun parta tiers pli e pli pauc requirents als chantuns. Fin la fin d'avust ha il Grischun anc survegnì 223 requirents d'asil. Il dumber maximal è stà l'onn 2015 cun 1'121 requirents d'asil. Ils centers èn actualmain occupads per 73% cun 726 persunas. Centers che restan per il mument en funcziun èn:

  • Cuira (center per l'emprima registraziun)
  • Valzeina (center per la sortida dal pajais)
  • Arosa, Cazas, Tavau, Mustér, Laax e Trimmis (centers da transit)

RR novitads 09:00++

Ord l'archiv: