Siglir tar il cuntegn

Header

cuntegn

Chantun Centrala 144 vegn en l'avegnir manada da l'Uffizi da sanadad

L'Uffizi da sanadad dal Grischun duai manar en l'avegnir la centrala dal clom d'agid sanitar 144. Quai ha la regenza decis. Fin uss aveva l'ospital regiunal Surselva a Glion manà quel. Pervi da difficultads gravantas da persunal han ins dentant stuì prender l'entschatta matg mesiras immediatas.

La regenza ha decis d'incumbensar l'Uffizi da sanadad cun la gestiun da la centrala dal clom d'agid sanitar 144.

audio
Mezdi: Uffizi da sanadad grischun maina centrala 144
ord Actualitad dals 02.06.2016.
laschar ir. Durada: 2 minutas 22 Secundas.

Ella desista da surdar la gestiun a l'ospital chantunal dal Grischun, che ha inoltrà l'offerta la pli favuraivla ord vista economica.

Il provediment da la regiun d'ospital tras il servetsch da salvament da l'ospital regiunal da la Surselva restia garantì, scriva il chantun.

L'argumentaziun da la regenza

Ils suandants motivs han incità la regenza da laschar manar en l'avegnir il chantun la centrala 144:

  • La centrala 144 è l'element central dal provediment medicinal en cas d'urgenza en il chantun. Sin la glista da las infrastructuras criticas da la Svizra da l'Uffizi federal da protecziun da la populaziun figureschan las centralas d'acziuns dals servetschs da salvament sin il medem stgalim sco las centralas da la polizia e dals pumpiers.
  • Uschenavant che quai è enconuschent vegnan las centralas dal clom d'agid sanitar manadas en tut ils auters chantuns dal maun public sez.
  • La segirezza da manaschi po vegnir procurada sez.
  • Sche la gestiun vegn surdada ad ina terza part, è il chantun dependent da quella, uschia che la segirezza da manaschi e la segirezza respectiva dal provediment da la populaziun e dals giasts na pon eventualmain betg vegnir garantidas.
  • Areguard il dretg da persunal è la situaziun per las collavuraturas ed ils collavuraturs da la centrala 144 la medema sco per las collavuraturas ed ils collavuraturs da la centrala operativa da la polizia chantunala.

Questa decisiun correspundia a la recumandaziun da la cumissiun chantunala da salvament, uschia la regenza.

Situaziun actuala tar la centrala 144

Pervia da difficultads gravantas da persunal tar la centrala 144 sajan vegnidas prendidas il cumenzament da matg mesiras immediatas a chaschun d'ina scuntrada cuminaivla da l'ospital regiunal da la Surselva, dal chantun e da la centrala 144, scriva il chantun.

L'Uffizi da sanadad haja mess a disposiziun ad interim ina da sias collavuraturas per la direcziun da la centrala 144, perquai che l'ospital n'eria betg en cas d'engaschar ina persuna da ses agen manaschi per questa incarica.

Departament da sanadad suttametta las actas a la cumissiun da gestiun

Sin fundament da las renfatschas exprimidas en las medias haja il Departament da giustia, segirezza e sanadad envidà la cumissiun da gestiun d'examinar detagliadamain ils andaments en connex cun las mesiras d'urgenza che sajan vegnidas prendidas per garantir la gestiun da la centrala dal clom d'agid sanitar.

RR novitads 10:00

Artitgels legids il pli savens