Cumpareglià cun il carnet da votaziun da la Confederaziun n’è il carnet da votaziuns chantunal betg propi survesaivel ed el para er gia antiquà cun ses design. Che quai sto sa midar, da quest avis è la pli auta grischuna, Tina Gartmann-Albin: «Er noss carnet da votaziuns sto vegnir pli cler e modern.»
Perquai vul ella metter en discussiun il carnet e ses design a la proxima sesida da la cumissiun da redacziun dal cussegl grond – sco presidenta dal Cussegl grond presidiescha ella era questa cumissiun. Quai che munta ch’ella surveglia quasi era il design dal carnet da votaziuns chantunal.
Tina Gartmann-Albin – In fan dal nov carnet da votar federal
Ch’il design dal carnet da votar dal chantun Grischun pudess ir en direcziun da quel da la Confederaziun è bain pussibel, cunquai che Tina Gartmann-Albin di cler: «Jau sun in fan dal nov carnet da votar da la Confederaziun.»
Quai saja in carnet che declera curt e concis sin las emprimas paginas per tge ch’i va e che mussia en letras grassa cotschnas, tge ch’il Cussegl federal ed il parlament hajan decis en chaussa avant ch’ils detagls suondian.
RR actualitad 08:20