Per quest intent ha il chantun elavurà in'analisa dals privels relevants per il chantun. Las vischnancas èn obligadas da medemamain analisar ils privels potenzialas che resultan sin lur territori tras la natira, tras la tecnica e tras la societad.
Prevenziun per evitar u minimar las ristgas
Cun agid da la prevenziun sa laschan evitar u almain minimar las ristgas per persunas, infrastructuras, terren cultivà, edifizis e mobigliar. La lescha da protecziun da la populaziun en il Grischun oblighescha il chantun d'analisar las periclitaziuns che han ina relevanza considerabla.
La lescha entra en vigur il prim da schaner 2016. L'analisa da las periclitaziuns dal chantun è vegnida preschentada a la publicitad il mars 2015.
Il chantun surpiglia la mesadad dals custs da las vischnancas
A las vischnancas stat a disposiziun in check da ristgas ch’è vegnì sviluppà da l'uffizi da militar e da protecziun civila, da l'uffizi da guaud e privels da la natira sco er da l'assicuranza d'edifizis dal Grischun (GVG) en il rom dal project GRIP (analisa da las ristgas, intervenziun, prevenziun per vischnancas).
Suenter l’evaluaziun fa in expert lura per la vischnanca in rapport che cuntegna indicaziuns pragmaticas davart ils privels priorisads e davart las mesiras pussaivlas. Ils custs per vischnanca importan tut tenor la grondezza tranter 8'000 e 20’000 francs, ma la mesadad dals custs vegn surpigliada dal GVG. Domat è stà la vischnanca da pilot per sviluppar il check da ristgas.
RR novitads 10:00