Siglir tar il cuntegn

Header

Ils bajetgs dal chantun che vegnan libers cun il bajetg da "sinergia".
Legenda: Immobiglias dal chantun en il center a Cuira che vegnan libers cun il nov bajetg sinergia. RTR
cuntegn

Chantun Chantun ha inoltrà dumonda da bajegiar per sinergia

Il chantun Grischun ha inoltrà la dumonda da bajegiar per il center d'administraziun chantunal sinergia. Per il project da 69 milliuns francs sto però vegnir quintà cun custs supplementars da 3,5 milliuns francs, perquai che la gronda part dals parcadis ston vegnir mess sut terra.

Pervia dal grond interess da realisar ulteriurs projects da chasas autas en il territori Cuira vest aveva la suprastanza da la citad da Cuira decidì il december 2014 d'instradar ina procedura dal plan d'areal. Quest plan prevesa ussa ch’ils vehichels parcads, duain da nov vegnir dischlocads sut terra per augmentar uschia la qualitad da vita.

Il plan da quartier per il project «sinergia» resguarda quest interess urbanistic e prevesa ussa perquai medemamain in'obligaziun da construir garaschas sutterranas, quai che munta dentant era custs supplementars da 3,5 milliuns francs, scriva la regenza grischuna.

audio
Mezdi: Chantun ha inoltrà dumonda da bajegiar per Sinergia
ord Actualitad dals 20.05.2016.
laschar ir. Durada: 2 minutas 13 Secundas.

105 da 150 parcadis sut terra

Cuntrari a la planisaziun oriunda cun 42 plazzas da parcar sutterranas ston ussa totalmain 105 da 150 parcadis vegnir construidas sut terra en il rom da l'emprima etappa. Il team da planisaders generals haja pudì chattar ina soluziun che n'influenzescha betg memia fitg il project existent, uschia il departament chantunal da construcziun. La garascha sutterrana ch'è la finala vegnida integrada en il project da construcziun vegnia cumplainamain en il segund plaun sutterran.

Expensas supplementaras èn cuvridas

Il credit da 69 milliuns francs ch'è vegnì concedì dal pievel grischun, na bastia bain betg per cuvrir ils custs supplementars da 3.5 milliuns francs. Tenor in'expertisa giuridica externa sajan quests custs dentant la fin finala expensas supplementaras betg previsiblas, che sajan er prescrittas tras lescha, argumentescha la regenza. Cur ch'il pievel grischun haja approvà il credit ils 11 da mars 2012, n'existiva nagina obligaziun da construir garaschas sutterranas ed i n'eria er betg previsibel ch'ina tala obligaziun vegnia introducida.

purtret da Mario Cavigelli
Legenda: ANR/F. Andry
I fiss stà ina soluziun nunpussaivla d’ir anc ina giada cun in credit supplementar avant il pievel.
Autur: Mario Cavigellicusseglier guvernativ

Buna soluziun

Uschia na sto il pievel betg approvar ils custs supplementars, ed il Cussegl Grond sto dir gea al preventiv. Mario Cavigelli, cusseglier guvernativ e manader dal departament da construcziun, traffic e selvaschina è zunt led: «I fiss stà ina soluziun nunpussaivla d’ir anc ina giada cun in credit supplementar avant il pievel.» Perquai hajan il chantun e la citad da Cuira tschertgà ina soluziun che constettia per tuts.

Tuts n’èn betg cuntents

Bruno Claus, deputà da la PLD e commember dal comité encunter “Sinergia” è trumpà.

audio
Saira: Sinergia - tge di il deputà ed adversari Bruno Claus?
ord Actualitad dals 20.05.2016.
laschar ir. Durada: 2 minutas 18 Secundas.
Sch’ils custs supplementars vegnissan tractads dal Cussegl grond sco credit posteriur, fiss ina discussiun cuntraversa stada pussaivla.
Autur: Bruno Clausdeputà Cussegl grond

Ultra da quai dubita el, ch’il chantun na saveva nagut dal plans da la citad da Cuira, da vulair metter ils parcadis en il sutterran. Il comité encunter sinergia legia uss da rudent l’expertisa e mira, sch’i fiss pussaivel d’intervegnir.

Tractar en moda speditiva

La soluziun che la dumonda da construcziun prevesa saja vegnida sviluppada ils ultims mais en in dialog permanent tranter las autoritads chantunalas e la citad da Cuira. Cunquai che la citad haja empermess da tractar en moda speditiva la dumonda da construcziun, quinta la regenza grischuna che la permissiun da construcziun vegnia concedida anc avant las vacanzas da stad. En quest cas pudessan las lavurs da construcziun gia cumenzar la primavaira 2017.

RR novitads 10:00

Immobiglias a Cuira ch'il chantun venda u visescha en l'emprim etappa

adressa dal bajetg
surfatscha immobiglia en possess (m²)
fit-chasa annual (CHF)
Planaterrastrasse 113212-
Loëstrasse 261290-
Loëstrasse 322451-
Loëstrasse 373000-
Loëstrasse 37 Pavillon-
-
Stadtgartenweg 113384-
Gäuggelistrasse 7-
46'332
Gäuggelistrasse 16-
64'198
Grabenstrasse 7/9-
84'732
Grabenstrasse 15-
130'752
Gürtelstrasse 89-
508'671
Hartbertstrasse 10-
76'197
Hofstrasse 11 (Hof 5)-
41'640
Hofgraben 5-
205'908
Masanserstrasse 14-
46'650
Planaterrastr. 14/16-
294'200
Quaderstrasse 15-
34'440
Zentrumzone Altstadt 2-
47'695
fit-chasa annual en total:
1'581'415

Artitgels legids il pli savens