Siglir tar il cuntegn

Chantun Chantun investescha en «fotonics»

La regenza grischuna ha decidì da sustegnair la Scola auta da tecnica ed economia HTW cun in credit maximal d'in mez milliun francs. Quai mintgamai per ils onns 2017 e 2018. Las investiziuns duain vegnir da bun al studi «fotonics».

Bajetg da la HTW:
Legenda: La regenza ha decidì d'investir in milliun francs en il studi da la HTW «fotonics». Keystone

Per il studi da bachelor «fotonics» dovri differentas installaziuns da laboratori, cun las qualas studentas e students pon rimnar experientschas praticas. Parallelmain als laboratoris da studen vegn installà in nov laboratori da perscrutaziun. En quel vulan ins elavurar projects d'industria dad interpresas regiunalas e naziunalas ch'èn gia avant maun.

Avantatg per interpresas e chantun

A maun da la perscrutaziun duai lura reussir a las interpresas da sviluppar products pli effizients ed uschia spargnar custs e temp da producziun. D'in bun know-how en il sectur da fotonica possia dentant er il chantun profitar. Tenor la regenza pudess il chantun vegnir pli attractiv sco lieu da producziun per interpresas novas u innovativas.

Fotonics

Fotonics cumpiglia en il senn pli vast tut ils products e tut las proceduras che sa basan sin la collavuraziun da cirquits electronics e da glisch.

RR novitads 09:00