Interpresas grischunas pon tegnair pass cun quellas en Svizra en connex cun la digitalisaziun. A questa conclusiun vegn la Scola auta da tecnica ed economia a Cuira. Per incumbensa dal chantun ha ella examinà la transfurmaziun digitala e furmà champs d’acziun. Facturs decisivs per la realisaziun da la digitalisaziun sajan d'ina vart ils collavuraturs e da l'autra vart la cultura en las interpresas. In obstachel che sa mussa savens en Grischun è la mancanza da persunas spezialisadas.
Interpresas èn responsablas – chantun porscha sustegn
Il chantun vesa las interpresas sco las realisaturas da la digitalisaziun. Incumbensa dal chantun saja però da stgaffir cundiziuns da basa favuraivlas per cuntinuar cun il svilup. Il rapport da la HTW ha perquai formulà quatter champs d'acziun per il chantun:
- stgaffir cundiziuns generalas per creschientscha e per innovaziun
- promover scolaziun e furmaziun supplementara
- optimar ils process da las autoritads
- promover l'infrastructura da la rait
Surtut tar il quart punct, pia tar l'internet ultra svelt (> 100 Mbit/s), vesa il chantun in basegn d'agir. Il chantun ha incumbensà ina gruppa d'experts da stgaffir la basa per promoziun da talas raits. L'atun vegn il concept suttamess a la regenza. Quel vegn er a cuntegnair propostas da soluziun per WLAN liber.
Credit d'impegn per stumplar la digitalisaziun
Durant la sessiun d'avust ha il Cussegl grond ultra da quai incumbensà la regenza, da stgaffir las basas necessarias per metter a disposiziun in credit d'impegn. Uschia duain star a disposiziun 40 milliuns francs per dar in stausch a la digitalisaziun en il Grischun.
RR novitads 10:00