Chantun sustegna scolina bilingua

La regenza ha approvà contribuziuns chantunalas er per la scolina bilingua a Cuira. Senza in incap da la citad da Cuira vessi dentant anc dà dapli daners.

Laschar ir video «Chantun sustegna scolina bilingua a Cuira»

Chantun sustegna scolina bilingua a Cuira

1:54 min, Telesguard dals 2.11.2017

Dapi l'onn da scola 2010/11 maina la scola da la citad da Cuira partiziuns bilinguas da la scolina en tudestg e rumantsch sco er en tudestg e talian. Fin ussa n'avevan quellas nagin dretg sin contribuziuns dal chantun, perquai ch'ellas n'eran betg cuntegnidas en il conclus da la regenza dals 5 da matg 2009 concernent «classas bilinguas sin il stgalim primar da la scola da la citad da Cuira».

Per quest motiv ha la scola da la citad da Cuira dumandà la regenza da cumplettar retroactivamain quest conclus per l'onn da scola 2016/17. Quai ha il chantun uss fatg ed uschia survegn la scola da la citad da Cuira – per l'onn da scola 2016/17 – 12'042 francs per 58 scolaras e scolars.

Per l'onn da scola 2017/18 vegnan las contribuziuns a la citad da Cuira ad importar 20'064 francs per 76 scolaras e scolars.

Incap procura che la citad survegn damain daners

La citad da Cuira avess gia gì dabun daners dal chantun dapi l’onn da scola 2014/2015. Pervia da sbagls da la citad na datti dentant betg quels daners. La citad n'haja betg inoltrà in concept cumplet al chantun, conceda Patrik Degiacomi. Cunquai ch’els na survegnian betg ils daners per quest dus onns manchian bun 30’000 francs.

RR novitads 10:00