La mesadad dals Svizzers e las Svizras che lavuran èn pendularis. 10% dad els han in viadi da lavur dad 1 ura e dapli. Ils ins van cun l'auto, auters piglian il tren. Il tren porta l'avantag ch'ins po lavurar durant il viadi. Perquai ha la Viafier federela savens bischlas electricas en ils vaguns per chargiar telefonin ubain il laptop. En ils vaguns da la Viafier retica tschertgan ils 25% passaschiers pendularis per il solit però invan ina tala bischla. Quai vul la Retica midar en il decurs dals proxims onns.
Lavurond en il tren cun il laptop fissi però era pratic dad avair ina colliaziun d'internet senza cabel (WLAN). Quai è gia standard tar differentas societads da tren en l'Europa, manca per gronda part en Svizra. Qua na prevesa la Viafier retica però nagina remedura, ha ditg Simon Rageth da la partiziun da communicaziun da la Viafier retica. Suenter avair examinà las variantas concluda la Retica che quai custassia memia char.
RR Actualitad mezdi 11:00