Per permetter visitas, ston las instituziuns avair in concept da segirezza. Temp per lavurar or quel han ellas fin ils 30 da matg. Subit che l'uffizi ha approvà il concept, pon las chasas puspè permetter visitas. Sco ch'il manader da l'Uffizi chantunal da sanadad, Rudolf Leuthold, ha ditg envers RTR, hajan bleras chasas d'attempads e da tgira gia inoltrà lur concept.
Las cundiziuns per visitas
Tranter auter valan las suandantas cundiziuns per far ina visita:
- Visitadras e visitaders ston purtar ina mascra.
- Maximalmain dus visitaders pro persuna en ina giada.
- Persunas che fan ina visita ston inditgar lur datas da contact («contact tracing»).
- Visitas ston ins annunziar ordavant.
- Visitadras e visitaders ston suttascriver, ch'els sa tegnan vid las reglas en chasa.
Las visitas pon avair lieu en la chombra persunala, en la cafetaria da l'instituziun u en locals aposta mess a disposiziun. Tenor Rudolf Leuthod saja er pussibel da bandunar l'instituziun. Quai dentant be, sch'igl è pussibel da resguardar er ordaifer l'instituziun las mesiras d'igiena e da protecziun.
Per visitas en spital na datti anc naginas schluccaziuns. Tenor il manader da l'Uffizi chantunal da sanadad sajan schluccadas dentant en lavur.
