Il manader da l'uffizi da chatscha dal Grischun Georg Brosi è fitg optimistic che las 2’300 selvaschinas vegnian sajettadas fin ils 18 da december. Gia l’ultima fin d’emna saja vegnì sajettà radund 500 tschiervs, quai malgrà che la chatscha n'ha anc betg cumenzà en tut las regiuns.
Naiv po avair influenza
Las premissas per il success sajan bunas, di Georg Brosi. I haja in zic naiv, la selvaschina saja avant maun ed era ils 3000 chatschaders che van a chatscha supplementara sajan motivads.
Ch' ina gronda quantitad da naiv pudess far in stritg tras la finamira dal uffizi da chatscha na craja Georg Brosi betg: «Sche la naiv vegn, sche va quai in pèr dis e cun il favugn è la naiv cun ina giada davent.»
Tgi ha la meglra quota?
Intginas regiuns cuntanschan meglier la finamira ch’autras. Durant ils onns n’èn quai dentant betg adina las medemas. Tge che croda en egl: Ils chatschaders da Favugn e Bragaglia cuntanschan bunamain adina cumplettamain la quota dal chantun. Auter sa preschenta la situaziun en l’Engiadina: Qua dovra quai il pli savens la chatscha supplementara.
RR actualitad 17:00