La sonda ha il guardgiachatscha Armando Janett dal Surses,tratg la sort en il studio dal Radio Rumantsch. La patenta da chatscha en la valur da 750 francs sponsurada da la Banca Raiffeisen Surselva gudogna Camillo Ganzoni da Samedan.
3 chatschadras e 18 chatschaders eran en concurrenza
Durant l'entira chatscha èn tut en tut 21 predas vegnidas annunziadas al Radio Rumantsch, quai mintgamai las 10.30 uras. En il chapè dad Armando Janett eran ils nums da 3 chatschadras e 18 chatschaders.
Üna bella surpraisa!
Armando Janett: «Ina chatscha paschaivla»
Per Armando Janett n'è betg be la preda l'impurtant vi da la chatscha, mabain er giudair la natira e passentar il temp en la natira. Il resun ch'el haja survegnì dals chatschaders en Surses saja stà quest onn fitg plaschaivel.
La fitg gronda part dals chatschaders haja gì success da chatscha e sajan stads cuntents. Gronda impressiun haja fatg ad el in chatschader ch'haja bunamain cridà dal plaschair cun annunziar, ch'el haja sajettà in buc da chamutsch.
Andri Tomaschett ha gudagnà il radio DAB
La gallaria da fotografias da chatscha ha pudì vegnir emplenida quest onn cun 65 fotografias da predas per part cun il chatschader u la chatschadra e per part senza.
Il victur dal radio DAB è Andri Tomaschett da Trun. El gudogna il radio per sia fotografia dal taur tschierv, ch'el ha sajettà ils 8 da settember en il territori da Trun.
RR 10:30 Accumpagnament