Quai che plascha a Gion Fry tar la campagna cunter l'iniziativa è, ch'i vegn lavurà cun in motiv, uschia ch'ins vesa gia da lunsch per tge ch'i va. Era plascha la lavur cun las colurs cun ferms cuntrasts. La campagna dals iniziants fetschia in zic in'impressiun uffiziala e na para tenor il profi da reclama betg uschè professiunala.
I dat ina gronda differenza tranter las duas campagnas.
Era en las raits socialas pli ferma
La pagina da Facebook dals adversaris haja interacziun cun la gruppa en mira e cun passa 580 persunas gia ina gronda communitad. Sin la pagina da l'iniziativa na saja dentant betg capità bler enfin ussa e quella ha il mument 40 persunas che simpatiseschan.
Betg mo il budget è decisiv
Per la campagna da votaziun han ils iniziants a disposiziun ina summa da 40'000 francs. Ils adversaris percunter investeschan radund 150'000 francs. Tenor Gion Fry è quai dentant betg il motiv principal per las differenzas da las campagnas. I saja era pussaivel da far ina buna campagna cun pli paucs daners.
En questa dimensiun da cifras na dependa quai betg enorm fitg dals daners.
Inserat cun fetus
Sper la campagna convenziunala han ils iniziants publitgà en la gasetta ina fotografia cun in fetus d'in tschierv. Cun tals maletgs sappian ins en mintga cas attrair attenziun, di Fry. I saja dentant ina dumonda da stil. El è da l'opiniun che questa moda da communitgar na saja betg buna.
RR actualitad 07:00