Siglir tar il cuntegn

Header

Tschiervs en la naiv.
Legenda: Pervi da blera naiv en tschertas regiiuns vegn la chatscha speziala interrutta. Keystone
cuntegn

Motivs da segirezza Chatscha speziala vegn interrutta

Er sche la finamira da cuntanscher ina cumpart dad animals feminins dad almain 50% n'è betg reussida, vegn la chatscha speziala interrutta pli baud che previs. Raschun è la blera naiv en tschertas regiuns.

En tschertas regiuns haja dà uschè blera naiv las ultimas emnas, ch'ils animals selvadis sajan vegnids restrenschids en lur moviment. Ina chatscha intensiva sin tschiervs e chavriels fiss uss in ferm disturbi e quai veglian ins impedir cun interrumper la chatscha speziala, scriva l'Uffizi da chatscha e pestga en ina communicaziun a las medias.

En las regiuns, nua ch'i dat gronds conflicts tranter il guaud e la selvaschina vegn la surveglianza da chatscha sche pussaivel anc a sajettar singuls animals. Uschia veglian ins limitar ils donns els guauds. Quellas intervenziuns vegnan cunzunt fatgas en il Partenz, il Signuradi, la Val da Rain da Cuira, la Tumleastga ed en tscherts territoris en Surselva.

Quasi cuntanschì las finamiras da sajettar

Durant ils mais november e december han ils chatschaders grischuns sajettà en il rom da la chatscha speziala 5'500 tschiervs. Quai correspunda a la cifra planisada da sajettar 5'560 tschiervs. Betg reussì n'èsi dentant da cuntanscher ina cumpart dad animals feminis dad almain 50%. Las cifras exactas vegnan communitgadas pli tard.

RTR novitads 12:00

Artitgels legids il pli savens

Scrollar a sanestra Scrollar a dretga