Siglir tar il cuntegn

Header

Navigaziun

Venanzi Schmed e sia dunna Isabelle Schmed.
Legenda: Venanzi Schmed e sia dunna Isabelle Schmed en la stizun da la mazlaria. RTR, Ronja Muoth
cuntegn

Pausa da Chatscha Las mazlarias èn ledas da la pausa da chatscha

Venanzi Schmed e ses team da la mazlaria Schmed a Breil han nagin temp da repaus durant la pausa da chatscha. Els ston nizzegiar il temp ed elavurar la preda per ch’els sajan suenter cun la lavur, cura che la chatscha va puspè liber.

En la gronda stanza, nua che la charn vegn elavurada èn mumentan sis dals tredesch mazlers vi da lavurar senza paus. Ils auters han liber. Davent dal tagliar si l’animal, fin elavurar la charn en pitschna tocca e vacumar ella, èn tuts fatschentads cun insatge.

Mumentan è gist anc il veterinari Urs Probst en la mazlaria e controllescha ils davos animals ch’èn vegnids remess l’emna passada. Pir cura ch’el ha dà la permissiun per l’animal ed els han taglià davent las parts betg bunas, dastgan ils mazlers lavurar vinavant cun l'animal selvadi.

Massa selvaschina ch’è pendi si vid las chommas en la frestgera.
Legenda: RTR, Ronja Muoth

La chatscha – blera lavur per tuts

Fin cura che la chatscha è a fin, vegn la mazlaria Schmed ad avair elavurà enturn 400 animals. Per in tschierv dovran sis mazlers circa ina ura temp. Quai munta, che tuts ston lavurar speditiv durant il temp da chatscha.

Savens na tanschi betg per in gentar ed insatgi sto adina esser qua a partir da las 6:30 fin las 21:30.
Autur: Venanzi Schmedmanader da fatschenta da la mazlaria Schmed a Breil

Venanzi Schmed manegia ch’ils giuvens mazlers sa legrian sin il temp da chatscha, perquai che lura marscha ina massa. E schegea che l’um da 52 onns è bain grat da l’emna pausa da chatscha, è el tuttina cuntent, cura che la chatscha è puspè a fin.

RR actualitad 11:00