Siglir tar il cuntegn

Header

cuntegn

Chantun Chor d'affons Sumvitg è vegnì surprais cun premi SRG.R

Ils uffants dal cor èn vegnids surprais il venderdi saira: Ina delegaziun da la SRG.R sut la direcziun dal president Oscar Knapp ha purtà il premi amez l'emprova da chant. La surpraisa saja gartegiada, scriva la SRG.R en ina communicaziun.

Il premi SRG.R 2018 giaja al chor d’affons Sumvitg en renconuschientscha da ses engaschi per la cultura da chant, scriva la SRG.R.

Il fenomen dal cor d'uffants en la vischnanca pitschna

Persvadì haja la suprastanza da la SRG.R tant il grond engaschament da passa 50 buobas e buobs sco er dals responsabels dal chor. Che tants giuvenils, e quai en ina vischnanca pitschna, sa decidian da chantar en in chor possian ins quasi numnar in fenomen che saja grev d’explitgar.

Quai, argumentescha la SRG.R, zunt en in temp nua ch'i dat tantas autras offertas «pudess ins pensar ch’il chantar en in chor na stat betg exnum sisum la glista dals hobis preferids».

«In siemi» è daventà in hit

L'engaschi dals commembers dal chor d’affons Sumvitg e lur dirigenta Flavia Walder-Hublard portia fritg: Quai sa mussia en il fatg che lur chanzun «In siemi» – da Gion Balzer Casanova cun in text da Silvana Candreia – è daventada l’onn 2011 in veritabel hit al Radio Rumantsch, terminescha la communicaziun.

Il premi è dotà cun 8'000 francs. El vegn surdà uffizialmain en il rom da la radunanza generala da la SRG.R ils 26 da matg 2018 a Landquart.

RR novitads 12:00

Artitgels legids il pli savens