La regenza grischuna ha nominà Christian Tannò sco nov secretari dal Departament d'infrastructura, energia e mobilitad. El suonda a Conradin Luzi che vegn a surpigliar ina nova sfida professiunala suenter in'activitad da radund 10 onns per il departament. El vegn a surpigliar questa funcziun il 1. d'avrigl 2021.
Christian Tannò ha 49 onns ed è creschì si ad Alvaschagn. Suenter la scola media commerziala a Samedan e suenter avair fatg la maturitad sin segunda via ha el studegià giurisprudenza a l'Universitad da Turitg. Tannò ch'è da lingua materna rumantscha e tudestga vul returnar, suenter plirs onns a Turitg, puspè en il Grischun.