Siglir tar il cuntegn

Header

Logo da l'emissiun dad SRF «Chumm und lueg»
Legenda: SRF
cuntegn

«Chumm und lueg» Istorgias da pli baud ord vitgs e valladas

L'emissiun «Chumm und lueg» che SRF ha emess dal 1977 fin 1991 aveva da lezzas uras status da cult. Uss revivan las emissiuns danovamain sin ils chanals da social media. RTR mussa las perlas dal Grischun.

Divertiment cun musica ed infurmaziuns ord la regiun - quai era il concept da l'emissiun «Chumm und lueg» moderada da Margrith Staub e Henryk Rhyn. Els han era fatg visitas en vitgs e valladas dal Grischun, tranter auter a Ftan, Vella, Mustér, Tschierv, Val Müstair, Bravuogn ubain a Zernez.

Mustér 1982

L'emissiun è stada ils 27 da favrer 1982 sin visita a Mustér. Navend da Mustér è vegnì preschentà l'entira Cadi quella saira. Ils tamburs, chors, musicas ed ils trubadurs èn sa mussads. Quai eran ils onns ch'ins aveva sis programs da televisiun e tut tenor emissiun seseva l'entira famiglia avant la televisiun.

Tranter auter ha er il mastral Mathias Quinter giugà ina rolla en questa emissiun. Insumma dastgan ins dir; politica e cultura, turissem e baselgia èn sa preschentads da lur meglra vart.

Zernez 1991

Per las giuvnas da la Riga da mattas da Zernez era l'emissiun dal 1991 in eveniment tut spezial. Ellas han pudì mussar in saut da gimnastica en televisiun – e l'entira Svizra ha pudì vesair quai.

Oz, 30 onns pli tard, mussan las mammas gugent il video a lur uffants e sa regordan anc bain vi da tut il travasch en vischnanca cur ch’ellas eran 11 u 12 onns.

Vella 1978

L’onn 1978 era la vischnanca da Vella in vitget da purs. Las vias n’eran anc betg catramadas ed il turissem aveva pir cumenzà a fitgar pe. La festa en la chapitala da la Lumnezia è vegnida sustegnida da la musica da Vignogn e da differents chors gronds e pigns. L’emissiun ha tranter auter tematisà la patruglia, che controllava il vitg durant che tut la glieud era en baselgia.

Ftan 1977

Cun ina visita l’onn 1977 ha «Chumm und Lueg» fatg fermativa en Engiadina Bassa a Ftan. Marcanta è la culissa amez Ftan Pitschen, cun dapli glieud sin plazza sco che la vischnanca aveva da quella giada. Discurrer tudestg cun uffants pli giuvens n’era bunamain betg pussibel, causa che quels discurrivan fin tar la quarta classa be rumantsch.

Tschierv 1985

Dal 1985 ha il president communal da Tschierv, Oswald Toutsch, declerà en l’emissiun, daco ch’ils Ladins dian «dunna Margrith» e betg «dunna Staub». Sper represchentaziuns musicalas da cors e musicas, è er quell’emissiun illustrada cun maletgs da la val, sias tradiziuns e sias valurs.

Bregaglia 1987

Il 1987 ha «Chumm und Lueg» er visità la Val Bregaglia. En quell’emissiun dentant betg cun esser live en val, dentant cun in omagi als dus artists Segantini e Giacometti, cun intermezzos musicals da societads indigens.

Moderaturs da cult

Henryk Rhyn e Margrith Staub
Legenda: SRF

Cumenzà la carriera schurnalistica ha Henrik Rhyn l'onn 1972 sco pledader tar radio DRS. Silsuenter è l'um da Soloturn stà redactur ed ha scrit blers gieus auditivs. Enconuschent a la televisiun è el daventà cun l'emissiun «Chumm und lueg». Hendrik Rhyn (79) è dentant era scriptur, actur ed artist.

Margrith Staub-Hadorn era oriundamain scolasta ed actura. L'onn 1965 ha ella midà tar radio DRS sco moderatura e redactura, trais onns pli tard è ella era stada da vesair sco pledadra a la televisiun e silsuenter sco moderatura da «Chumm und lueg». Sco dunna pensiunada ha ella publitgà texts sin dialect bernais, sco per exempel «Gedankefötzeli». L'onn 2007 è Margrith Staub-Hadorn morta da sia greva malsogna.

RTR actualitad 07:00

Artitgels legids il pli savens

Scrollar a sanestra Scrollar a dretga