En il Grischun è il dumber da dischoccupads danovamain sa reducì. Il zercladur èn vegnids nudads en Grischun 865 dischoccupads. Quai èn 569 damain ch'anc il matg. Tenor las novas cifras da l'uffizi chantunal per industria e mastergn è la quota da dischoccupaziun en il Grischun cunquai sa reducida dad 1,3 sin 0,8%.
Dals 865 dischoccupads eran 403 dunnas e 462 umens. Ils pli blers dischoccupads hai dà en ils secturs da la hotellaria cun 245 dischoccupads, suandà dal commerzi en detagl cun 89 dischoccupads, traffic e transport cun 64 ed il sectur da sanadad cun 57 persunas senza occupaziun. Persunas dischoccupadas a lunga durada hai dà il zercladur 44, il matg eran quai anc 54.
Dischoccupaziun en Svizra
Il medem trend sa mussa er en il rest da la Svizra. Cun radund 97'000 persunas senza lavur è la quota da dischoccupaziun en l'entir pajais ida enavos il zercladur sin 2,1%. Il matg muntava quella anc a 2,2%. Damain dischoccupads èsi surtut vegnì dumbrà tar ils emploiads cun ina vegliadetgna sur 50 onns.
RR novitads 09:00