Siglir tar il cuntegn

Header

video
51'000 persunas cun lavur curta en Grischun
Or da Telesguard dals 09.06.2020.
laschar ir
cuntegn

Cifras da dischoccupaziun Mintga segund emploià en il Grischun è en lavur curta

Las novas cifras mussan per il matg in lev augment visavi l’avrigl: En tut èsi 5’825 manaschis che han introducì lavur curta - cun circa 51'000 emploiadas, communitgescha il chantun.

En temps normals bastian dus collavuraturs per elavurar las dumondas da lavur curta, di Paul Schwendener, schef da l’uffizi per industria, mastergn e lavur. Dapi il lockdown sa fatschentian 80 persunas cun las dumondas. I saja gidanters dad auters uffizis, ma era persunas ch’ins haja engaschà aposta.

Jau lavur qua dapi 30 onns – quai è insatge maiudì
Autur: Paul Schwendenerschef da l'uffizi per industria, mastergn e lavur

Uschiglio controlleschian ins minuziusamain mintga ura da mintga persuna en lavur curta. Cun tantas dumondas saja quai nunpussaivel. Ins controlleschia sulet la plausibladad.

Fin uss n’hajan ins anc fastizà nagliur ch’in patrun avess empruvà da cugliunar a moda conscienta e cun energia criminala tar la lavur curta. Qua u là capitian dentant sbagls ch’insatgi dumondia memia bler u memia pauc. Quai sa laschia lura curreger cun in telefonat cun il manaschi pertutgà, di il chau da l’uffizi d’industria e lavur.

Confederaziun fa controllas

En cas d’ina cugliunaria conscienta inoltrass ins dentant ina denunzia tar la procura publica grischuna. Plinavant controlleschia la Confederaziun cun intginas provas las indemnisaziuns per lavur curta.

Tenor mia experientscha èn ils patruns grischuns sincers e na cugliunan betg.
Autur: Paul Schwendenerschef da l'uffizi per industria, mastergn e lavur

In zic pli paucs dischoccupads

Il matg èn 3'620 persunas stadas senza lavur en il Grischun. Cumpareglià cun l'avrigl è il dumber sa sbassà per 152 persunas. Quai scriva l'Uffizi d'industria, mastergn e lavur dal chantun Grischun. Ils pli blers dischoccupads haja dà en l’hotellaria, suandà da traffic e transport.

Da las en tut 2'620 persunas dischoccupadas eran 1'770 dunnas e 1'850 umens. Il matg èn vegnidas dumbradas 72 persunas dischoccupadas da lunga durada. Cumpareglià cun il mais precedent cun 65 cas è quest dumber creschì.

En Svizra avanza il dumber da dischoccupads

En l'entira Svizra èn stadas 155’998 persunas senza lavur l'avrigl. Quai correspunda ad ina quota da dischoccupaziun da 3,4%, sco quai ch'il Secretariat da stadi per l'economia SECO scriva.

RTR novitads 09:00

Artitgels legids il pli savens

Scrollar a sanestra Scrollar a dretga