Il november èn 1'573 persunas stadas senza lavur en il chantun. Quai correspunda ad ina quota da dischoccupaziun da 1,4%. En cumparaziun cun l'october è il dumber creschì per 151.
Plinavant datti 959 persunas senza lavur, ch'èn dentant er betg sin la tschertga dad ina plazza. Tar quellas tutgan tranter auter persunas ch'èn vid ina scolaziun supplementara.
Dapli umens che dunnas
Dals 1'573 dischoccupads èn 707 dunnas e 866 umens. Il pli aut dumber da persunas senza lavur è vegnì registrà tar l'hotellaria (692), suandà da l'industria da construcziun (175), il sectur da la sanadad (80) e tar il commerzi en detagl (71).
En l'entira Svizra è il dumber da dischoccupads creschì da 101'684 sin 106'330. La quota da dischoccupads è tar 2,3%. Plinavant èn radund 76'000 persunas vegnidas registradas ch'èn betg a la tschertga.
RTR novitads 08:30