Blers chantuns en Svizra han introducì in obligatori da mascras. Suenter il traffic public èsi uss era savens da purtar mascra en las stizuns. Pli ditg che la situaziun da corona cuzza e pli savens ch'ins dovra mascras. Blers investeschan perquai en mascras da taila. Quellas pon ins lavar e duvrar pliras giadas. La purschida da mascras da taila è fitg gronda, perquai èsi magari grev da differenziar tranter bunas e schlettas mascras.
Mascras ston filtrar bain
Il pli impurtant punct sch'ins cumpra ina mascra è che quella filtrescha bain. Il virus da corona sa derasa tras ils daguttins en l'aria. Mascras da taila na vegnan savens betg da filtrar l'aerosol – las pli pitschnas particlas da quels daguttins. Sch'ins vul esser segir ch'ina mascra da taila è pli u main segira, pon ins sa tegnair vid las recumandaziuns da la task force da la Confederaziun:
- Ins sto pudair trair flad bain tras la mascra.
- La mascra sto tegnair enavos daguts da spida e da mucosa.
- 70% da las particlas dad 1 micrometer ston restar en la mascra.
- La mascra sto anc filtrar tuttina bain suenter avair lavà ella 5 giadas sin 60 grads.