Savens è la resposta «Na» cura ch’il persunal da cassa dumonda sch’ins vul la quittanza. E sch’ins prenda ina giada ella, lura mo per savair mirar sch’il cassier u cassiera ha dà en correctamain las acziuns. Uschia ch’ella sa tschenta baud u tard en il rument. Era per l’ecologia n’èn quels cedels betg buns. Ad onn vegn duvrà pliras tschientmilli tonnas palpiri. Uschia ch’igl è meglier da desister dad els.
Datti alternativas da controllar la cumpra, schegea ch’ins desista d’ina quittanza?
Gea. I dependa dentant nua ch’ins fa sias cumissiuns. Possessurs d’ina supercard u carta da cumulus san drizzar en online da survegnir la quittanza via telefonin u per e-mail.
In collavuratur da la stizun fa reproschas a mai d’avair engulà. Dentant hai jau nagina quittanza sco cumprova. Tge sai jau far?
Sch’ins vegn en quella situaziun e n’ha betg pli ina quittanza, datti nagin motiv da vegnir gnervus. Las bleras cassas han in sistem nua ch’ins sa persequitar enavos la cumpra. Uschia ch’ins sa cumprovar da betg esser in da la grifla lunga.
In da mes products cumprads è donnegià. Sai jau returnar quai product senza quittanza?
Tenor Maria Kressbach – l’experta da temas da consum tar SRF – sajan las stizuns u butias enconuschentas da commerzi en detagl culantas quai che pertutga products pli bunmartgads. Cunzunt è ina restituziun pussaivla sch’i sa tracta da products da l’atgna marca. Auter vesi ora tar products pli chars, sco per exempel ina televisiun donnegiada. Lura èsi meglier da salvar la quittanza – cunzunt sch’ina garanzia è integrada.