Siglir tar il cuntegn

Header

audio
Festas da chant e da musica – co vinavant?
Or da Actualitad dals 28.05.2021.
laschar ir. Durada: 03:03 minutas.
cuntegn

Co vinavant? Anc bleras intschertezzas tar festas da chant e musica

Chantaduras e chantadurs, musicantas e musicants d'ina entira val vegnan ensemen. I dat concerts, rapports da giuria, ina tenda da festa e bler applaus. Pliras festas che fissan stadas planisadas, han ins dentant spustà u stritgà.

Sch’i va per festas da musica è surtut il proxim temp anc bler intschert, uschia Andy Kollegger, president da l'Uniun chantunala da musica. Quant ditg che la pandemia va propi n’è betg cler. Vinavant n’èsi er betg cler, sche la glieud haja pli tard anc retegnientschas tar occurrenzas grondas.

I na vegn segir betg ad esser simpel da turnar puspè tar ina veglia normalitad.
Autur: Andy Kolleggerpresident Uniun chantunala da musica

Perquai metta il president grondas speranzas en las occurrenzas grondas da test, che duain avair lieu il proxim temp. Quellas duessan er mussar tgenins «recepts» ch'èn dumandads per l'avegnir. Perquai che diversas festas da musica èn vegnidas spustadas, quinta el cun conflicts da termin.

Cumenzar pitschen

Er tar las festas da chant stoppia quai anc ir pass per pass. Quai di Lucretia Bärtsch, presidenta da l’Uniun chantunala da chant. Pli impurtant che las festas grondas saja dentant actualmain, ch’ils chors cumenzian puspè a chantar dapli.

A mai mancan en emprima lingia ils concerts en in rom pli pitschen.
Autur: Lucretia Bärtschdpresidenta da l’Uniun chantunala da chant

Cura che la situaziun permettia, s’allegria ella dentant da puspè ir ad ina festa pli gronda. Surtut las festas districtualas hajan ina gronda impurtanza per il chant – tant sco lieu da sentupada, ma er sco schanza per sa sviluppar musicalmain.

Dad organisar ina festa districtuala resta dentant vinavant ina sfida. Quai è adina collià cun in grond sforz per l’uniun u er la vischnanca. Quai era dentant gia avant la pandemia ina sfida.

RTR actualitad 07:00

Artitgels legids il pli savens

Scrollar a sanestra Scrollar a dretga