Co vinavant cun la chatscha grischuna? Tge duai esser lubì e tge betg? E tge reglas duain valair? Il Cussegl grond po decider en chaussa enten discutar la lescha da chatscha ed in'iniziativa.
Ina «chatscha etica che sa cumporta cun la natira»
Quest'iniziativa deriva da protecturs d'animals e vuless restrenscher la chatscha grischuna cun total nov puncts, tranter auter:
- Proteger en general vatgas-tschierv e chauras-chavriel che portan e che han pitschens
- Scumandar traplas per pigliar animals e scumandar da metter estga per carmalar animals
- Scumandar da sajettar tut ils utschels che n'èn betg protegids tras la lescha federala
- Introducir in paus d'enviern dal 1. da novemeber enfin il cumenzament da la chatsch'auta
- Per ir a chatscha valan limitas d'alcohol en il sang tenor las leschas davart il traffic sin via
- Uffants enfin 12 onns na dastgan betg accumpagnar chatschaders e na dastgan era betg vegnir motivads per la chatscha entras la scola
La regenza grischuna propona al Cussegl grond da declerar ina part da l'iniziativa sco nun-valaivla perquai ch'ella cuntrafa al dretg federal. Ina part da l'iniziativa saja valaivla e possia vegnir suttamessa ad ina votaziun dal pievel.
Reveder la lescha da chatscha
4 pretensiuns dals iniziants ha il cusseglier guvernativ Mario Cavigelli acceptà da fixar en la lescha da chatscha grischuna, p. ex. la limita d'alcohol u il scumond da pigliar animals cun traplas. Plinavant è previs en la lescha da chatscha tranter auter:
- Auzar ils custs per la patenta da chatscha
- Prolungar la chatscha cun quatter dis supplementars durant l'october
Entrar u betg entrar en la discussiun?
Igl è dentant tut auter che segir sch'il Cussegl grond entra insumma en la debatta enturn la lescha da chatscha. La fracziun da la PLD ed ina part da la PBD argumentescha ch'i saja memia bler intschert actualmain enturn la chatscha e na vul betg tractar la lescha da chatscha. Era la fracziun dals chatschaders cun il president Christian Kaspar ha midà maini e pledescha per betg entrar en la materia.
In'ulteriura iniziativa - quella per abolir la chatscha supplementara - è actualmain pendenta tar la dretgira a Losanna, cunquai ch'ils iniziants n'han betg acceptà la decisiun dal Cussegl grond da declerar ella sco nun-valaivla.
RR actualitad 12:00