Da nov fa Nino Schurter reclama per la regiun turistica da Lugano. Quai pervia che l'organisaziun turistica Grischun Vacanzas n'ha betg vulì collavurar cun il dominatur da la scena da mountainbike indigen. I na saja betg pussaivel da collavurar cun persunas singulas pervi dal mandat da prestaziun e la strategia da Grischun Vacanzas, declera Martin Vincenz, il directur da Grischun Vacanzas. In sponsoring na fetschian ins betg. Projects cun persunas singulas vegnian dentant adina puspè fatgs.
Nus avessan era gugent fatg in project cun Nino Schurter. Nus n'essan dentant betg vegnids da realisar quai ed uschia avain nus stuì desister da quai.
Ils giavischs da las duas partidas gievan pia dapart: Ina partida giavischava in project e l'autra partida vess gugent collavurà cun in sponsoring. Uschia n'èsi betg vegnì tar ina collavuraziun.
In Scot enstagl dal matador local
Dentant collavura Grischun Vacanzas cun il renumà biker da la Scozia Danny MacAskill. Cun lez è vegnì producì in video per il chanal da Youtube per preschentar la cuntrada dal Grischun.
Tenor Martin Vincenz haja quai da far cun la gruppa en mira da Grischun Vacanzas ed insumma nagut cun la persuna Nino Schurter. En il chantun Grischun dettia quai diversas spartas da mountainbike. Per la sparta sportiva, nua che Nino Schurter è il superstar, saja quai gia vegnì fatg bler. Latiers dettia quai er differents eveniments en il chantun, sco per exempel ils campiunadis mundials a Lai.
Da l'autra vart dettia quai en il chantun era numerus uschè numnads «trails», quai èn trutgs da velo. E cun MacAskill ch'è sin quest champ in dals gronds stars dal mund emprova l'organisaziun turistica da fascinar uschè bleras persunas sco pussaivel per quest sport.
RR actualitad 17:00