Cler, i possia anc dar surpraisas, uschia il scienzà da la politica da l'universitad da Turitg, Daniel Bochsler. I saja dentant da spetgar ch'ils verd-liberals perdian lur sez. Tenor el saja il scenari il pli probabel che la PLD survegnia quel. Il sez ch'ella aveva pers avant quatter onns.
Surpraisas possia quai be dar sch'i dettia grondas differenzas tar il dumber da vuschs cumpareglià cun las davosas elecziuns. Ils verd-liberals pon tenor Daniel Bochsler mo salvar lur sez sch'els fan extrem bler dapli vuschs ch’avant quatter onns. Quai na saja dentant betg da spetgar.
La sperdita dal sez fiss tenor Daniel Bochsler er strusch stada d'evitar entras la colliaziun cun las partidas dal center. La prognosa dal politolog è quella che Josias Gasser sto puspè dar enavos ses sez als liberaldemocrats. Sper quai saja da quintar che la PCD, la PBD, la PS ed er la PPS pon mantegnair lur sezs.