La regenza grischuna ha approvà gist plirs projects da protecziun en il chantun. Per construir rempars en il torrent Aua da Vau en Val Müstair contribuescha il chantun 235'000 francs. La Confederaziun sa participescha cun ina contribuziun da 336 000 francs a quest Project.
Per segirar la via chantunala tranter Rueun e Tavanasa da crudada da crappa ha la regenza approvà il project da 1,87 milliuns francs da las vischnancas da Breil e Glion. Per proteger la via chantunala duai il territori vegnir segirà cun raits cunter crudada da crappa sin ina lunghezza da 585 meters.
E la vischnanca da Scuol survegn glisch verda per construir ina nova staziun da mesiraziun per constatar a temp il privel da lavinas per lung la via da S-charl sco er en la part sid da l'Engiadina Bassa. Per quest project garantescha la regenza ina contribuziun chantunala da 204'000 francs.
