Premissas per engrondir l'Ospital Engiadin'Ota avant maun
La Regenza ha approvà la revisiun parziala da la planisaziun locala che la vischnanca da Samedan ha concludì ils 19 da fanadur 2020. Cun quai èn stgaffidas las premissas da la planisaziun dal territori per renovar e per engrondir l'Ospital da l'Engiadin'Ota. Quai ha il chantun annunzià. Concret vegnan enzonads var 3'400 meters quadrat da la zona da tegnair liber, en la zona per edifizis e stabiliments publics. Percunter vegnan dezonadas ina surfatscha da var 1'190 meters quadrat en la zona d'agricultura ed ina surfatscha da var 2'200 meters quadrat en il «ulteriur territori communal».
Cun adattar ed engrondir il spazi da l'Ospital Engiadin'Ota vulan ils responsabels tranter auter optimar il lavurar.
Correcziun da la via da Lü
La Regenza ha approvà il project d'exposiziun per curreger la via da Lü tranter Lüsai e Pra da l'Aqua en la Val Müstair. Il traject ha ina lunghezza da circa 1,1 kilometers. Quel tschancun duai vegnir schlargià a 4,2 meters per permetter a vehichels da cruschar senza privel.
Facilitaziuns per regular las populaziuns da lufs
La regenza ha proponì adattaziuns per la revisiun planisada da l'Ordinaziun federala da chatscha per pudair garantir la coexistenza tranter ils umans, ils animals da rapina gronds ed ils animals da niz.
RTR ha gia rapportà:
