Quest concept da protecziun han suttascrit l'uvestg Vitus Huonder sco era las presidentas ed ils presidents da las corporaziuns da l'uvestgieu. Cun agid da quest concept duai dar en l'uvestgieu ed en las plaivs che tutgan tiers ina cultura da conscienza.
Cun quest document ademplescha l'uvestgieu da Cuira la pretensiun da la conferenza dals uvestgs svizra. Quella prescriva dapi il prim da mars che las diozesas, ed autras instituziuns catolicas, ston avair in concept da prevenziun per agir a moda conscienta in cun l'auter.
Son Gagl sco exempel
L'uvestgieu da Cuira n'ha dentant betg inventà da nov la roda. Ins haja prendì sco exempel il model da Son Gagl, ch'i dat gia dapi l'onn 2017. Plinavant han els er laschà cussegliar dal gremi d'experts per cas da mulestas sexualas da Son Gagl.
Suttascripziun tar engaschament
Il concept da Cuira prevesa er ch'il tema d'approximitad e distanza sto vegnir discurrì tar in discurs dad engaschament cun las persunas. Sche la persuna vegn engaschada sto ella plinavant suttascriver ina cunvegna «s'inscuntrar a moda responsabla». Plinavant sto ina persuna che vegn engaschada per lavur pastorala u per lavurar en scola u cun giuvenils mussar in extract dal register penal.
Curs obligatoric davart il tema «approximitad e distanza»
Entaifer dus onns ston spirituals absolver in curs davart il tema «approximitad e distanza». Tals curs èn lura er pli tard obligatorics. Er tar ils discurs da persunal sto quai vegnir tematisà.
Er per l'intervenziun prevesa il concept cler, co ch'igl è d'agir. Il gremi dal fatg «mulesta sexuala en l'ambient da la baselgia» è l'emprim post da consultaziun. Plinavant è l'uvestgieu s'obligà d'annunziar tals cas a la polizia. Pertge tals cas ston vegnir persequitads.
RR novitads 20:00