Suenter che l'aura sa quieta plaunet è la gronda part da las vias en Grischun puspè avertas.
Anc serradas èn:
- Per motivs da segirezza resta il Pass da l'Umbrail serrà, quai almain fin la mesemna ils 2 da settember.
Puspè avertas èn:
- La via da Brinzauls tranter Crappanaira e Lantsch è puspè averta. Ella era stada serrada per motivs da segirezza.
- La via tranter Langwies ed Arosa.
- La via dal Lucmagn è stada serrada tranter Curaglia e Fuorns pervia d'ina bova. Pervia dad ina ulteriura bova è er la via sur il Pass dal Lucmagn serrada en omaduas direcziuns davent da S. Gions. La via è stada serrada la dumengia fin las 17:00.
- La Via da Malögia è stada serrada tranter Vicosoprano e Casaccia pervi dad ina bova ch'è vegnida dal Valun dal Largh. La via è stada serrada dapi sonda fin dumengia saira a las 18:00
- Per motivs da segirezza èn la fin d'emna er diversas vias lateralas en Engiadina Bassa ed en la vischnanca da Mustér stadas serradas.
- Tranter Glion e Trun è il traffic stà impedi sonda bun'ura pervi dad in crap sin via – sco la Polizia chantunala ha confermà sin dumonda da RTR.
- En la vischnanca da Bregaglia hai dà la sonda in alarm en la Val Bondasca. Sco quai ch'in commember dals pumpiers da la vischnanca ha confermà envers RTR è quai stà in fauss alarm.
Per parts da la Surselva, dal Grischun Central, la Mesolcina e la Bregaglia ha Meteo Svizra inditgà fin la dumengia suentermezdi il pli aut stgalim da privel da malauras. Tenor SRF Meteo han ins mesirà a Soglio en Bregaglia 130 millimeters plievgia e sin l'Ospizi dal Bernina schizunt 181 millimeters.
Qua vai tar la situaziun actuala da las vias e dal traffic.