Constanza en il midament - 40 onns post da cussegliaziun Adebar

Dapi 40 onns èn las collavuraturas dal post da cussegliaziun Adebar qua per gidar tar dumondas ni forsa era quittads pertutgant la gravidanza, la sexualitad, la famiglia ni en general il partenadi. In temps nua che bler è sa midà tenor la manadra Susanna Sigriest Moser.

Banner dil post da cussegliaziun Adebar. Bild in Lightbox öffnen.

Legenda da maletgs: Adebar, il post da cussegliaziun per damondas da famiglia, sexualitad, gravidonza e partenadi. RTR, G. Caviezel

Sa mida saja la lavur da cussegliaziun adina puspè en quels 40 onns, di Suanna Siegrist Moser, la manadra dal post da cussegliaziun Adebar. Cumpareglià cun pli baud dettia quai per exempel ozendi bler pli bleras metodas da sa preservar da betg vegnir en speranza.

L’entir tema da HIV e Sida haja era midà bler quai che pertutga la schientscha da la sanadad sexuala. «Lura natiralmain era l’entira discussiun publica e lura la votaziun davart interrumper la gravidanza ha purtà ina gronda midada», concluda Suanna Siegrist Moser. «Uschia pon dunnas fin ad in tschert termin sezzas decider sch’ellas vulan l’uffant u betg.»

Susanna Siigrist Moser, la manadra dad Adebar. Avrir maletg en lightbox.

Legenda da maletgs: Susanna Siegrist Moser, la manadra dad Adebar. RTR, G. Caviezel

«  Natiralmain sa quai bain chaschunar irritaziuns e problems en ina relaziuns »

Suanna Siegrist Moser
manadra Adebar

Iniziativa vegn per gronda part da l’um

Vitiers vegnian las midadas ch’i haja dà cun l’internet. Uschia hajan ins in tut auter access ozendi tar la sexualitad che quai ch’ins haja gì avant 40 onns. Uschia è quai pussibel che mintgin po consumar pornografia via internet. «Natiralmain sa quai bain chaschunar irritaziuns e problems en ina relaziuns», di Suanna Siegrist Moser ch’è terapeuta da sexualitad. «Per exempel sche l’um ha vesì insatge en in porno ed ha lura il sentiment che la dunna chattia quai era bun, lezza dentant n’è insumma betg intgantada.» E lura emprovian ellas dad Adebar dad intermediar.

Quai che dettia en egl, è ch’ins saja ozendi pli spert pront da tschertgar agid sch’i dettia problems ella sexualitad en ina relaziun e che l’iniziativa da tschertgar agid vegnia per il pli da l’um.

Pornos gia en la 6avla classa

L’internet e cun el era ils pornos han era influenza sin la cussegliaziun e l’educaziun sexuala che Adebar far en scola. Uschia sajan las dumondas dals buobs da la 6avla classa dumondas che pertutgian la sexualitad. «La gronda part dals buobs ha gia vesì in porno sin il telefonin, gia avant d’insumma avair dà ina giada maun ad ina buoba», di Suanna Siegrist Moser. «Uschia na fetschia quai era betg smirvegliar ch’ils buobs da la 6 classa han gia ussa in grond stress sch’els èn equipads en urden cun lur members virils.»

Las dumondas da las buobas sajan perencunter restadas pli u main las medemas sco pli baud en la scola primara almain. Sin stgalim superiur saja quai schont insatge auter puspè.