Siglir tar il cuntegn

Header

cuntegn

Chantun Constituziun da la Baselgia evangelica è sin buna via

La nova la constituziun da la Baselgia evangelic-refurmada dal Grischun frunta sin acceptanza. Quai ha communitgà la decana Cornelia Camichel Bromeis suenter la sinoda a Cuira. La segunda versiun dal sboz che duai remplazzar la constituziun dal 1978 vul promover la collavuraziun tranter las plaivs.

In emprim sboz aveva la Baselgia evangelic-refurmada gia tramess la primavaira 2011 en consultaziun. Quel aveva dentant procurà per critica – surtut pervi da dus puncts:

  • il dumber da las plaivs en il Grischun duai vegnir reducì sin 19
  • il pe da taglia duai vegnir unifitgà per tut las plaivs dal Grischun

Quests dus puncts han ins ussa stritgà en la versiun surlavurada che la sinoda ha discutà glindesdi e mardi en sia sesida a Cuira.

audio
Saira: Baselgia evangelica e sia constituziun
ord Actualitad dals 30.01.2017.
laschar ir. Durada: 3 minutas 12 Secundas.
L'emprim sboz era memia radical - dentant betg fauss.
Autur: Cornelia Camichel Bromeis Decana da la baselgia evangelica GR

Ina revisiun totala da la constituziun saja ina bun'occasiun da ponderar da nov l'entira baselgia, declera la decana Cornelia Camichel Bromeis. Las debattas e discussiuns en plirs gremis hajan mussà en tge direcziun che la Baselgia evangelica duai ir. Quai saja stà in process impurtant.

La proposta actuala saja surtut en ina lingua fitg simpla. La finamira saja d'avair ina constituziun che mintgin e mintgina sin via chapeschia – enstagl d'ina constituziun plaina cun construcziuns teologicas. Che l'entira lavur va a fin gist durant l'onn da 500 onns refurmaziun, è per Cornelia Camichel Bromeis in ferm simbol.

Ultim pled en chapitel han las refurmadas ed ils refurmads

Suenter la debatta en la sinoda evangelica surlavura la cumissiun anc ina giada las propostas ed elavurescha in messadi per il cussegl grond evangelic. Quel tracta la refurma en sia sesida dal zercladur. La populaziun refurmada duai lura votar la primavaira 2018 en chaussa.

L'entira revisiun da la constituziun ha custà circa 600'000 francs.

RR actualitad 17.00+

Artitgels legids il pli savens