Sur l’entir Grischun ora è la cifra da dumondas da fabrica inoltradas tar las vischnancas restada stabila ils davos onns. Quai mussa ina retschertga dad RTR. Las valurs e cun quai il volumen dals projects da questas dumondas dentant èn idas enavos. Tenor la statistica da la segirada d’edifizis da bun 2,5 mia francs l’onn 2012 sin radund 1,4 mia francs l’onn 2015.
Curt suenter la votaziun eran dentant vegnidas inoltradas fitg bleras dumondas pervia da la malsegirezza, co la lescha vegn a vesair ora. Ins po discurrer dad in ver boom da bajegiar gist suenter la votaziun.
Pli bass na vegnan las cifras dentant betg pli a crudar.
Quai mussia il trend da las cifras da l’emprim mez onn dal 2016.
-10 fin 15% sur l’entir chantun ora
Gia curt suenter la votaziun avevan ils impressaris grischuns fatg quint da perder tranter 10 e 15% da tut las incumbensas. E quai saja ussa era capità, declera Andreas Felix.
Quest regress vala dentant per tut las incumbensas, damai da la construcziun auta plus la construcziun bassa. Las incumbensas dal maun public per la construcziun bassa guliveschian numnadamain per il mument il regress tar la construcziun auta.
Prognosa da BAK Basel
Che il punct il pli bass è cuntanschì aveva era il studi da BAK Basel che l’institut aveva fatg sin incumbensa dals impressaris grischuns prognostitgà dal 2014. Uschia mussa quella prognosa in augment enfin l’onn 2014, in regress dal 2015 ed ina stabilisaziun ni perfin in levet augment davent dal 2016.
Ch’il pli nausch saja surmuntà, na vul Andreas Felix tuttina betg confirmar. I saja da differenziar. Per la Val dal Rain da Cuira vali quai bain, dentant betg per forza per las regiuns turisticas.
Grondas differenzas regiunalas
Sco prognostitgà da l’institut da perscrutaziun han las firmas da bajegiar en la Val dal Rain da Cuira pudì tegnair lur svieuta malgrà l’iniziativa da segundas abitaziuns. Quai conferma era Claudio Giovanoli, schef da Lazzarini e represchantant dal Grischun dal nord tar l'Uniun dals impressaris dal Grischun.
En l’Engiadina ed il GR Central dentant han las firmas da construcziun pers enfin 80% da lur incumbensas tar la construcziun d'abitaziuns. Quai di Roland Conrad da la firma Foffa&Conrad, che represchenta l'Engiadina tar l'Uniun dals impressaris. Perquai hajan intginas firmas stuì reducir il persunal per bundant la mitad.
En Engiadina Bassa e la Val Müstair na vegn per il mument fabritgà gnanc ina unica chasa da pliras famiglias.
Era en Surselva hajan ins constatà in regress tar il volum da construcziun e tar las incumbensas, di Daniel Blumenthal, schef da la Valaulta Berni SA che represchenta la Surselva tar l'Uniun dals impressaris. I sa tractia dad in minus da bundant 50% tar la construcziun d'abitaziuns.
Persunal
Ch’i dà grondas differenzas regiunalas sa mussa era cun in sguard sin las cifras da collavuraturs da las firmas da construcziun. Sur l’entir chantun ora è quella cifra restada magari stabila.
En las regiuns turisticas dentant avevan ins temì da stuair relaschar in terz enfin la mitad da tut ils collavuraturs. En Surselva na saja quai betg stà necessari, ha Daniel Blumenthal, concedì envers RTR. En l'Engiadina ed il Grischun Central dentant haja quai dà firmas che hajan stuì reducir lur persunal massivamain.
La concurrenza è creschida
Cun quai che la lavur manca vi e pli en las regiuns grischunas van intginas firmas da construcziun en auters lieus per incumbensas. Specialmain interessanta è la Val dal Rain da Cuira. Dentant betg mo per firmas grischunas, mabain era per firmas da la Bassa.
Uschia è la concurrenza creschida en questa regiun massivamain, di Andreas Felix. Quai saja ina sfida ma era ina schanza per las firmas da construcziun.
RR actualitad 12:00
