Siglir tar il cuntegn

Header

cuntegn

Chantun Contribuziun chantunala per passlung a Tavau

La regenza grischuna conceda a la vischnanca da Tavau 1 milliun francs per construir l'infrastructura da passlung.

Tranter auter duai vegnir adattà il trassé da la loipa, amplifitgada l'ennavada da la pista dal cup mundial ed augmentada la capacitad da l'uschenumnà «snow-farming» (conservar la naiv durant la stad). Ultra da quai è planisà in nov edifizi d'infrastructura.

L'utilisaziun dal stabiliment è er d'impurtanza ord vista dal turissem. D'ina vart èsi da far quint cun pernottaziuns supplementaras, da l'autra vart vegn meglierà il potenzial da passlung gia existent a Tavau ed uschia l'attracziun internaziunala ch'è colliada cun quai.

Project d'impurtanza naziunala

Il chantun po pajar contribuziuns per construir e per renovar stabiliments da sport d'impurtanza naziunala, sche quels èn cuntegnids en il concept per implants da sport d'impurtanza naziunala (CISIN) e sch'els vegnan correspundentamain promovids da la confederaziun.

Il CISIN ha l'intent da mantegnair u da stgaffir bunas premissas per las federaziuns naziunalas da sport en il sectur dals stabiliments da sport d'impurtanza naziunala.

Artitgels legids il pli savens