Tar las controllas fatgas il 2020 hai dà tar bun la mesadad dals manaschis neginas reclamaziuns. Quai è il punct da vista positiv. Igl è però era uschia, che bunamain la mesadad dals menaschis han gì puncts ch'èn vengids crititgads. I saja dentant da metter en relaziun quai, di Giochen Bearth, manader da l'uffizi per la segirtad da victualias.
Questas cifras mussan ch'i vegn controllà fitg detagliadamain. I na tanscha betg sche nus schain mo bun u betg bun.
Las controllas duessen gidar als ustiers ed a las ustieras da vesair nua ch'i pon anc sa meglierar .
Tenor las reclamaziuns vegnan ils manaschis partds en classas da privel, in enfin quatter. Dus menaschis èn vegnids en la classa 4. Quests manaschis èn vegnids serrads per immediat. La gronda part dils manaschis cun reclamaziuns è en la classa dus, numnadamain 30%.
Sch'insatge è en la classa dus n'è quai insumma nagin problem. Insatge ch'è en questa classa ha forsa ina documentaziun che maunca, quai n'ha dentant nagin'influenza sin la spisa en il taglier.
Pervi da la pandemia saja stà pli grev da far las controllas dals manaschis, ha l'uffizi per la segirtad da victualias dal Grischun scrit en ina communicaziun. Uschia sajan vegnidas fatgas radund 150 controllas pli pauc che anc l'onn avant. Tar las quasi 2'400 controllas fatgas, hai dà tar passa 1'000 da quellas ina u pliras chaussas da reclamar.